DATAlife participou, o 25 de xaneiro, no segundo encontro nacional dos European Digital Innovation Hubs (EDIHs) que se celebrou no Parque Científico e Tecnolóxico de Bizkaia. Representantes de 22 EDIHs rexionais asistiron á xornada co obxectivo de fortalecer a rede de cooperación.

Durante a sesión intercambiáronse experiencias de colaboración con empresas nacionais e internacionais e establecéronse as liñas xerais para abordar desafíos como a transformación dixital e o auxe das tecnoloxías avanzadas.

A Escola de Organización Industrial (EOI) informou aos EDIHs sobre o estado actual do Programa de Apoio aos Digital Innovation Hubs (PADIH), a iniciativa do Ministerio de Industria e Turismo (MINTUR) que busca mellorar a competitividade das pemes a través do asesoramento para a implantación de tecnoloxías dixitais.

A maiores, presentáronse as últimas actualizacións sobre a evolución do Digital Transformation Accelerator (DTA), unha iniciativa de servizos promovida pola Comisión Europea (CE) que ten por obxectivo consolidar e ampliar a rede de EDIHs a través de actividades de networking, difusión, cooperación e transferencia de coñecemento.

Durante o encontro tamén se expuxeron dez casos de éxito de colaboracións entre EDIHs e outros axentes económicos, como empresas nacionais, internacionais ou administracións públicas. Neste caso contaron con DATAlife para falar sobre O rol dos EDIHs en proxectos europeos.